1517

Au même temps mourut Ferdinand Roy d’Arragon, qu’on appelloit Jean Grippon, ayeul maternel de Charles d’Autriche, parquoy ledit Charles pour recueillir la succession s’embarqua pour aller en Espagne, qui fut cause de rompre l’entreveuë des deux Princes. A cette occasion le Roy qui se préparoit pour aller à Calbray changea son dessein, & reprint son chemin à Blois, & de Blois à Amboise: auquel lieu peu de temps après accoucha la Royne Claude de son fils aisné au mois de Février 1517, lequel le seigneur Laurens de Medicis, neveu du Pape Léon, au nom dudit Pape, tint sur les fons, & fut nommé François. Audit baptesme furent faictes les plus grandes magnificences tant en joustes, escarmouches, batailles faintes, qu’assiegemens de places, qu’on eust veu du vivant des hommes. Le Roy pour confirmer l’amitié entre ledit Pape & luy, donna à Laurens de Medicis Duc d’Urbin en mariage une sienne cousine, fille & héritière du feu Comte de Boulongne, & de la soeur de feu François de Bourbon, Comte de Vendosme, qui estoit mort à Verceil au retour du Roy Charles, de Naples. Audit baptesme vint presenter son service au roy le Prince d’Aurenge en grand equippage, lequel s’en alla mal content, & se retira au service de Charles d’Autriche roy d’Espagne.