Compte particulier de maistre Bastien de Mareau conseillier et maitre de la chambre aux deniers du Roy notre sire, de la recepte et despence pour lui faicte a cause des deniers a luy ordonnez par le Roy, notredit sire, pour convertir et employer ou fait de son office un payement de plusieures parties extraordinnaires que ledit sire a ordonné estre payees au marchans, bouchers, poissonniers, apothicaires, fruictiers, boulengiers et officiers fournissans lostel dudit Seigneur pour leur recompense des pertes quilz ont faictes en service du Roy notredit sire, tant au baptizement de Monseigneur le daulphin que pour la reception et traictement que ledit seigneur a fait faire au duc d’Urbin a sa venue et reception depuis le XIII^ème jour d’avril jusques au XX^ème jour de may M V^c XVIII.

Et aussi, pour plusieurs pertes et dommaiges quilz ont eues durant les voyaiges que a faitz ledit seigneur depuis trois ans tant en son duché de Millan, a Chamberi, Daulphiné Normendie et Picardie, a la fourniture dudit hostel pour la despence qui fut faicte au mariaige dudit duc d’Urbin.

Et pareillement, pour défrayer, fournir et payer les parties et despence de bouche faicte par les conseilliers et ambassadeurs du Roy d’Angleterre, en la ville de Paris depuis le XII^ème jour de decembre audit an mil cinq cens dix huit jusques au XV^ème jour de janvier ensuivant, semblablement pour fournir, frayer et payer la despences de bouche, fruicterie, paneterie eschanconnerie, et autres menuz fraiz qui ont esté faitz et ordonnez pour la despence du festin et banquet royal fait par ledit seigneur ausdit conseilliers et ambassadeurs du Roy d’Angleterre en la court et chastel de la Bastille lez la rue Sainct Anthoine en ladite ville de Paris.

Le present compte rendu a court par ledit maitre de la chambre aux deniers en personne et Guillaume Voisin son procureur comme il sensuis :

Recepte

Et premierement

De maistre Jehan Sapin, conseillier du Roy notre sire et receveur general de ses finances, la somme de deux mil livres tournois audict de Mareau, ordonnée par le Roy notre sire dès le VI^ème jour de mars mil cinq cens et seize, par ung aquict levé et expedié sur ledit Sapin pour convertir, bailler et avancer aux bouchers, marchans fournissans l’ostel dudit sire, sur ce qui leur peut estre deu, tant de l’ordinaire de leur marché et fourniture du temps passé que des recompenses quilz demandent pour les extraordinaires et parties par eulx fournies, qui ne sont de leur marché, en actendant quelles soient arrestées et liquidées. De laquelle somme, ledit maitre de la chambre aux deniers a faicte et baillé sa quictance audit receveur general, signée de son seing manuel le XII^ème jour de mars l’an mil cinq cens et XVI ; pour cecy, II mille livres tournois.

De Jehan l’Alemand le Jeune, conseillier du Roy notre sire tresorier et receveur general de ses finances les pays de Languedoc, Lyonnois Forest et Beaujoillois, la somme de deux mil sept cens cinquante trois livres ung sole dis dix deniers tournois, ordonnée par le Roy notre sire audit maitre Bastien de Mareau, pour convertir et employée ou fait de son office au payement de plusieurs parties extraordinaires que ledit seigneur luy a ordonné payer tant aux marchans fournissans son hostel pour leur recompense des pertes quil ont eues en son service durant trois annees dernieres passée ou voyaiges que lecdit seigneur a fait hors de son royaume et villes et aussi pour la despense et traictement du duc d’Urbin et despenses faicte en son mariaige, comme plus a plain est declaré en l’intitulacion de ce compte et ce, oultre et par dessus les autres sommes de deniers qui lui ont esté et seront cy apres ordonnées pour semblable cause. De laquelle somme de II mille VII cent LIII livres I sol X deniers tournois, ledit maitre de la chambre aux deniers a faicte et baillé sa quictance audit tresorier de Languedoc, signée de sa main le XXIII^ème jour de juillet l’an mil cinq cens dix huit ; pour cecy, II mille VII cent LIII livres I sol X deniers tournois.

De maistre Jehan Ruze, conseillier du Roy nostre sire et receveur general de ses finances sur le long des rivieres de Seyne et Yonne, la somme de deux mil cinq cens livres tournois ordonnée par le Roy notre sire a cedit maitre de la chambre aux deniers pour convertir et employer ou fait de son office au payement de plusieurs parties extrardinaires que ledit sire lui a ordonné payer a plusieurs. De laquelle somme, il a faicte et baillé sa quictance audit receveur general signée de sa main le dernier jour de juillet l’an M V^c dix huit ; pour cecy, II mille V cent livres tournois.

Dudit maitre Jehan Sapin, receveur general, la somme de huit mil soixante et huit livres quatre solz huit deniers tournois ordonnée par le Roy notredit sire, audit maitre de la chambre aux deniers pour convertir et employer ou fait de sondit office et mesmement pour défrayer fournir et payer les parties et despenses de bouche faicte par les conseilliers et ambassadeurs du Roy d’Angleterre en la ville de Paris depuis le XII^ème jour de decembre dernier passé jusques au XV^ème jour de janvier ensuivant, semblablement pour fournir frayer et payer la despense de bouche, fruicterie, paneterie eschanconnerie et autres menuz fraiz qui ont esté faitz et ordonnez pour la despense du festin et banquet Royal fait par ledit seigneur ausdits conseilliers et ambassadeurs d’Angleterre en la tours et chastel de la Bastille lez la Rue Saint Anthoine de ladite ville de Paris et ce, oultre et par dessus autres sommes de deniers a luy ordonnée par le Roy notredit sire pour semblable cause. De laquelle somme de VIII mille LXXVIII livres IIII sols VIII deniers tournois, ledit maitre de la chambre aux deniers a faicte et baillé sa quictance audit Sapin, receveur general, signée de sa main le IX^ème jour de may l’an mil cinq cens et dix neuf ; pour cecy, VIII mille LXVIII livres IIII sols VIII deniers tournois.

Despense de ce present compte

Et premierement

Deniers baillez a gens et officiers qui en donnent compter, neant

Autre despense

Aux bouchers, poissonniers, apothicaires, fruictiers, boullengers et officiers fournissans l’ostel du Roy notre sire et autres marchans, lesquelz ont fourny les denrrées et marchandises de leurs offices et mestiers tant au baptizement de monseigneur le daulphin, filz du Roy notredit sire, que pour la reception et traictement que ledit sire a fait faire a son cousin le duc d’Urbin a sa venue et reception et aussi plusieurs pertes et dommaiges aux voyages faitz par icelui sire depuis trois ans, tant en son duché de Millan, a Chambery, Daulphiné, Normandie et Picardie, la somme de sept mil deux cens cinquante trois livres dix huit solz ung denier tournois. Laquelle, le Roy notredit sire, par ses lettres patentes signées de sa main et de maitre Robert Gedoyn, secretaire de ses finances, donnée au vergier le XVII^ème jour de juillet l’an mil cinq cens dix huit, a ordonné leur estre payée et baillée compte par maitre Bastien de Mareau son conseillier et maitre de sa chambre aux deniers, des deniers qui luy ont esté ordonnez pour convertir ou fait de sondit office un payement de plusieurs parties extraordinaires, quil luy a ordonné payer pour le fait de sadite chambre aux deniers en ensuivant la teneur desquelles lettres patentes et expeditions de messieurs les generaux des finances faicte sur icelles. Cy rendues, ledit maitre de la chambre a fait les payemens qui s’ensuivent :

A Jehan Savary, Francois de Gyem, Jehan d’Espaigne et Nicolas Bouchault marchans fournissans la maison du Roy de boucherie et poullaillerie et a Jehan Cadiot, Gilles Barbes et Huguet Billault marchans fournissans les hostel du Roy de poisson deaue doulce et parerie, la somme de quatre mil huit cens livres tournois ; qui est pour lesdits bouchers IIII mille livres tournois et pour lesdits poissonniers VIII cent livres tournois, a quoy se montent et ont esté arrestez par les maitres d’ostel d’icelui sire au bureau de sa chambre aux deniers, les parties desdites pertes et dommaiges et interestz quilz ont portées et soustenues a la fournirture quilz ont faicte durant lesdites trois années et voyages cy devant declarez, tant de chars, gibiers et vollailles que de poissons pour l’ostel dudit seigneur, ainsi quil appert par lesdites parties qui sont signées et arrestées par lesdits maistres d’ostel actachées ausdites lettres patentes du Roy soubz le contreseel de sa chancellerie cy devant rendu, et qui serviront sur la partie ensuivante, par vertu desquelles et desdites parties signées et arrestées par lesdits maitres d’ostel, a esté fait payement aux dessus nommez de ladite somme de IIII mille VIII cent livres tournois. C’est assavoir ausdits bouchers IIII mille livres tournois comprins les II mille livres tournois que ledit maitre de la chambre aux deniers leur avoit baillé et dont il avoit esté appoincté par aquict sur le receveur general maitre Jehan Sapin dès le VI^ème jour de mars M V^c XVI et ausdits poissonniers VIII cent livres tournois comme par deux leurs quictances faictes et passées en la presence de Jaques Richard, tabellion Royal a Blois et des tesmoings a ce appellez nommez sesdites quictances, le IX^ème et XI^ème jour d’aoust mil cinq cens dix huit. Cy rendu pour cy IIII mille VIII cent livres tournois.

Et ausdits bouchers, poissonniers, apothicaire, fruictiers, boulengiers et officiers dudit hostel du Roy notre sire et autres marchans dessusdits, la somme [de] deux mil quatre cens cinquante trois livres dix huit solz ung denier tournois, a quoy se montent les parties par eulx fournies de leurs mestiers et marchandises tant pour le luminaire du baptesme de mondit sire le daulphin que pour la despense et festoymens que ledit sire a faitz a mondit sire le duc d’Urbin depuis le XIII^ème jour du mois davril jusques au XX^ème jour de may mil cinq cens dix huit, dont les parties par le menu sont contenues es declaracions d’icelles, signées et certisfiées par lesdits maitres d’ostelz du Roy semblablement actachées audites lettres patentes. Laquelle somme a esté payée, c’est assavoir, a Mathurin Forget et Daniel Charton, fruictiers ordinaires de la maison du Roy, la somme de huit cens vingt livres huit solz dix deniers, declarée par le menu en leurs parties de flambeaulx et torches de cire blanche et jaulne, fournies par eulx tant pour le baptizement de mondit sire le daulphin que des banquetz des nopces dudit duc d’Urbin et le lendemain desquelles parties, sont arrestées et signées par Jehan Francois, l’un des maitres d’ostelz du Roy, et en leur quictance faicte et passée en la presence de Michel Porier, tabellion royal a Blois et des tesmoings nommez en icelle le XVIII^ème jour d’aoust M V^c XVIII

A Jehan Savary et Francois de Gyen marchans fournissans la maison du Roy de boucherie et poullalerie, la somme de six cens quatre vingts dix sept livres six solz obole pite tournois pour les parties par eulx fournies de boucherie et poullalerie et autres choses de leur marché, a la reception, banquet et festoyemenz que ledit seigneur a fait faire a la venue dudit duc d’Urbin durant le temps dessus declaré.

A Laurens Pigier, paticier du Roy notredit sire, la somme de soixante et quatorze livres quatre solz dix deniers tournois pour ses parties par lui fournies pour la despense dudit duc d’Urbin, durant le temps dessus declaré.

A Benoist Guilleret, apothicaire du Roy, la somme de six vingts trois livres huit solz cinq deniers tournois pour parties d’apothicairerie a luy fournies pour la despense dudit duc d’Urbin esdit mois d’avril et may.

Aux dessus nommez Mathurin Forget et Daniel Charton, fruictiers ordinaires du Roy notredit sire, la somme de quatre vingts dix sept livres huit solz trois deniers tournois pour les parties par eulx fournies de leur estat de fruicterie aux banquetz festoymens et despense faicte par le Roy notredit sire, audit duc d’Urbin durant le temps dessus declaré.

A Jehan Gaultier, demeurant a bloiz, la somme de quatre vingts dix neuf livres dix huit solz deux deniers tournois pour six pippes de vin claret de Bruyere par luy baillez es mois d’avrilz et may dernier passé, pour la despense dudit duc d’Urbin luy estant a Amboise.

A Jehan Cadiot, Gilles Barbes et Huguet Billault marchans fournissans de poisson deaue doulce l’ostel du Roy, la somme de deux cens cinquante trois livres tournois huit solz deux deniers obole tournois, a eulx ordonnées pour les parties par eulx fournies de leur estat de poissonnerie et perrerie et autres choses de leur marché a la reception, banquet et festoymens dudit duc d’Urbin.

A Juliart Baugier, apothicaire de la Royne, la somme de vingt livres tournois pour parties de son mestier par luy fournies pour ledit duc d’Urbin ou mois de [blanc] mil cinq cens dix huit jour de ses nopces.

A Pierre Biard, verdurier, la somme de vings et une livre tournois pour ses parties de verdurerie par luy fournies pour la despense dudit duc d’Urbin esdit mois d’avril et may.

A Pierre Randon, saulcier de cuisine du Roy notredit sire, la somme de neuf livres tournois pour avoir fourny de verjust et vinaigre pour ladite despense dudit duc d’Urbin.

A Jaques Bienvenu, maitre queux de la bouche du Roy, la somme de quarante solz tournois pour partie par luy fournies comme dessus.

A Michel de Vernoy, varlet de fournere, la somme de cinquante solz tournois pour huit corbeille par luy achaptées et payées pour le banquet fait audit duc d’Urbin.

A Jehannot Merendet la somme de cent solz tournois pour boires quil a baillez pour le banquet et service ordinaire dudit duc d’Urbin.

A Jaques Melet, marchant demourant a Blois, la somme de trente cinq livres neuf solz tournois pour VIII quil a baillé et fourny pour la despense dudit duc d’Urbin.

A Anthoine Nocher, sommelier de paneterie du Roy, la somme de treize livres quatorze solz tournois pour avoir fourny de sallades esdit mois d’avril may et juing pour la despense dudit duc d’Urbin.

A Jaquette de Ledin, lavandiere de paneterie de commun, la somme de cent solz tournois pour plussieurs foiz avoir blanchy le linge qui a servy ausdits banquetz.

A Jehan du Vinier, fruictier ordinaire, la somme de quinze livres dix solz six deniers tournois pour parties par luy fournies pour ledit duc d’Urbin au moys d’avril M V^c XVIII.

A Olivier Cheneau la somme [de] cinquante trois solz huit deniers tournois pour bois par lui fourny et baillé pour la despense dudit duc d’Urbin.

Comme appert, par les quictances de tous les dessus nommez cy rendues et le surplus mont [à] sept vingts quinze livres dix huit solz ung denier obole pite tournois a este payé en menuz parties, dont n’a esté prins quictance ; pour cecy, lesdites parties sont au dessoubz de L sol tournois. Pour cecy, reprins en despense ladite somme de II mille IIII cent LIII livres XVIII sol deniers tournois pour les parties de paneterie, eschanconnerie, cuisine, fruicterie fourriere et autres parties de despenses de bouche et fraiz contenuz et declarez par le menu en ung cayer de pappier signé et arresté par lesdits maitres d’ostelz du Roy notre sire, ausquelz il en avoit baillé en chargement. Lesquelles parties ont esté par luy fournies, baillées et delivrées compt par le commandement et ordonnance verballe du Roy notre sire, aux personnes nommées oudit cayer pour les causes y contenues et ce, pour la despense des ambassadeurs du Roy d’Angleterre depuis le douziesme jour de decembre M V^c XVIII, quilz vindrent devers le Roy en son palais royal a Paris luy faire la reverence jusques au XV^ème jour de janvier ensuivant audit an. Auquel jour, ilz deslogerent de ceste ville de Paris en ce comprins ung festin que ledit seigneur leur feist a son devis et progect en la Bastille de Sainct Anthoine. Laquelle despense et fraiz, le Roy notre sire a fait veoir, calculler et gecter et arrester par sesdits maitres d’ostelz et a monte a la somme de sept mil huit cens dix huit livres trois solz huit deniers tournois, en ce non comprins deux cens cinquante livres tournois qui sont couchez cy apres ou chappitre de gaiges et sallaires. Laquelle somme de sept mil huit cens dix huit livres trois solz huit deniers tournois, le Roy notre sire par ses lettres patentes signées de sa main et de maitre Nicole de Neufville, secretaire de ses finances, donné à Paris le XII^ème jour de fevrier oudit an M V^c XVIII, veriffiées et expediées par messieurs les generaulx des finances le XIII^ème jour dudit mois, a mandé ausdits generaulx des finances souffrir, permectre et consentir estre alloué les comptes et rabatu de la recepte dudit maitre de la chambre aux deniers par nos services des comptes, ausquelz il a mandé ainsi le faire sans difficulté en rapportant lesdits lettres avec ledit cayer y actache soubz le contreseel de la chancellerie sans quil soit tenu rapporter quictances des parties contenues oudit cayer que de celles qui montent cent solz tournois et au dessus, ainsi quil est plus a plain contenu et declaré en icelle lettres patentes et expedicion de mesdits sieurs les generaulx cy rendus, par vertu desquelles, ce present maitre de la chambre aux deniers reprent cy en despense, ladite somme de VII mille VIII cent XVIII livres III sol VIII deniers tournois, quil a payées, baillée et distribuée aux personnes denommées oudit cayer et dont il a recouvert les quictances des grosses parties et sommes de deniers et des autres menuz parties au dessoubz de cent solz tournois, n’en a recouvert aucunes quictances, pour ce quil n’est acoustume de recouvrer pour le fait de ladite chambre aux deniers et sont, cy rendu, lesdites quictances pour ce VII mille VIII^c XVIII livres III sols VIII deniers tournois.

Gaiges et sallaires

A maistre Sebastien de Mareau, conseillier et maitre de la chambre aux deniers du Roy, la somme de deux cens cinquante livres tournois a lui tanxée et ordonnée par le Roy notre sire et ses lettres patentes signées de sa main et de maistre Nicolle de Neufville, secretaire de ses finances, données a Paris le XII^ème jour de fevrier mil cinq cens dix huit, deuement veriffiées et expediees par messieurs les generaulx desdites finances le XIII^ème jour dudit mois, oultre ses gaiges et autres biensfaitz pour ses peines, sallaires et vaccacions ,davoir vacqué et entendu a tenir le compte de la somme de sept mil huit cens dix huit livres trois solz huit deniers tournois pour les parties de despense de bouche et fraiz contenuz et declarez par le menu en ung cayer de pappier, actaché ausdites lettres patentes soub le contreseel de la chancellarie.

Des fraiz desdits ambassadeurs et autres affaires pour le fait de ladite charge aussi pour ses peines, sallaires et vaccacions d’avoir tenu le compte de la somme de cinq mil deux cens cinquante trois livres ung solt dix deniers tournois tant pour ung festin que le Roy sert en son chastel d’Amboise aux espousailles du duc d’Urbin, lequel estoit venu devers ledit seigneur en ambassade de par notre tres sainct pere le Pappe, pour les confederacions et amytiez dentre luy et le Roy notredit sire que pour la recompense que iceluy seigneur a ordonnée estre faicte aux bouchers et poissonniers de son hostel de la perte quilz ont faicte au fournissement de sa despense ordinaire. Laquelle somme de V mille II cent LIII livres I sol X deniers tournois pour le festin dudit duc d’Urbin lui feut baillée en assignacion qui luy convint faire recouvrée a ses propres coustz et despens et a grans fraiz. Et pour ce faire, luy a convenu entretenir et sallaiger plusieurs ses clercs et serviteurs ainsi que lesdites lettres patentes et expedicion de mesdits sieurs les generaulx des finances cy devant rendu plus a plain le contiennent, par vertu desquelles, ledit maistre de la chambre aux deniers a prins et retenu par ses mains des deniers a luy ordonnez pour convertir ou fait de sondit office et commission ladite somme de II cent L livres tournois.

Despense commune

Pour la facon et escripture de ce present compte contenant, comprins le double d’icelui la quantité de vingt fueillet de parchemin, qui au feur de II sol VI deniers chacun d’iceulx, vallent 40 sol parisis vallent.