KK//289/1

[fol°272 verso et fol°273 recto]

A maistre Florimond Fortier, commis par le Roy, notre sire, tenir le compte et faire les paiemens des fraiz extraordinnaires de son artillerie, la somme de treze cens soixante douze livres dix solz tournois a luy ordonnee par ledit sire et ses lettres patentes signees de sa main et de maistre Robert Gedoyn, secretaire de ses finances, donnees a Amboise le XXVI^e jour d’avril l’an mil V^c et XVIII deuement veriffiees et expediees par messires les generaulx desdites finances le derrenier jour dudit moys, pour convertir et employer ou faict de sadite commission ou paiemens de la voicture tant par terre que par eaue de trente six grosses pieces d’artillerie, deux cens hacquebutes a crocq, deux cens cinquante halcretz, trois cens picques ferrees, pouldres et autres munitions depuis le chasteau de Tours jusques en la ville d’Amboise ; voicture par terre et eaue de deux gros canons de fer depuis la ville de Romorantin audit Amboise ; Achaptz de plomb, fer, cordaiges et drogues a faire feu artificiel avecques plusieurs autres choses neccessaires servans au tournoy que ledit sire fait faire en la ville d’Amboise ainsi que lesdites lettres patentes et expedition declairees. cy rendues plusaplain le contiennent par vertu desquelles, ce present receveur general a paié comptant audit maistre Florimond Fortier ladite somme de XIII cent LXXII livres X sols tournois, comme par sa quictance signée de sa main le XIIe jour de may l’an mil Vc XVIII cy rendu appert pourcecy XIII cent LXXII livres X sols tournois.

 [fol° 301 verso]

A monseigneur Jehan d’Albret sieur d’Orval, la somme de Seize mil livres tournois, a luy pareillement ordonnée Par le Roy et sondit roole, pour sa pension durant les annees finissans V^c XVIII et XIX ; Appoincté annee M V^c XX, IIII M livres et es annees dudit roole XII mil livres ; cestassavoir annee V^c XVIII, mil V^c dix huit cy rendue ladite somme de XII mil livres tournois.

[Fol°352, verso – Fol°353 recto]

A maistre Lyenard da Vince, paintre ytalien, la somme de deux mil escus soleil a luy ordonnee par le Roy et sondit roole pour sa pension d’icelles deux annees par moictié par vertu duquel, ce present receveur general a paié comptant audit maitre Lyenard da Vince pour l’annee de ce compte, la somme de II mil livres tournois comme par quictance de luy et de Francisque Meyllero montant II mil IIII cent livres cy rendues, qui servira sur la partie ensuyvante, appert pour cecy II mil livres tournois.

A messire Francisque Meyllero, ytalien gentilhomme qui se tient avec ledit maitre Lyenard, la somme de huit cens livres tournois a luy semblablement ordonnee par le Roy et sondit roole pour sa pension des deux annees d’iceluy, qui est a raison de II cent ecuz souleil par an en ensuivant la teneur duquel roole, ce present receveur general a paié comptant pour l’annee de ce compte audit messire Francisque, la somme de IIII cent livres tournois come par sa quictance rendue sur la partie precedente, appert pour cecy IIII cent livres tournois.

A maistre André dela Sartre paintre du pays de Florence la somme de quatre cens cinquante livres tournois a luy ordonnee par le Roy et sondit roole pour sa pension d’une annee et demye esdites deux annees d’icelui roole, par moictié par vertu duquel luy a esté paié comptant pour l’annee de ce compte, la somme de II cent XXV livres tournois comme par sa quictance signee a sa requeste du seing manuel de maistre Michel Chevalier, notaire et secretaire du Roy, le XVème jour de mars l’an mil Vc XIX montant a IIII cent L livres tournois rendue et servant cy et qui servira en semblable chappitre du compte precedent pour ladite somme de II cent XXV livres, appert pour cecy II cent XXV livres tournois.

[fol° 381 verso]

A monseigneur Charles duc d’Alencon et conte d’Armagnac, la somme de mil livres tournois a luy ordonnee par le Roy, notre sire et ses lettres patentes signees de sa main et de maistre Robert Gedoyn, secretaire de ses finances, donnees a Angiers le VIII^e jour de juing l’an mil V^c XVIII expediees deuement par messires les generaulx desdites finances le IX^e jour dudit moys pour luy ayder a faire ediffier [répétition : ediffier] et bastir une maison ou chastel d’Amboise pour loger et retirer son train et ce, en oultre, et par-dessus autres dons, pensions et biensfaitz quil a et pourra avoir dudit sire en ceste presente annee ainsi que lesdites lettres patentes et espedicions dicelles cy rendues plusaplain et contiennent ; par vertu desquelles, ce present receveur general a paié comptant a mondit sieur le duc d’Alencon ladite somme de M livres tournoiz comme par sa quictance signee de sa main et scellee du seel de ses armes le XXI^e jour de juing l’an mil V^c XVIII aussi cy rendue appert pour cecy M livres tournois.

 [fol°382 recto]

A messire Loys de Brezay, chevalier de l’ordre du Roy et Grant seneschal de Normandie, la somme de Mil escuz d’or soleil auquel ledit sire a fait don par ses lettres patentes, signees de sa main et de maistre Robert Gedoyn, secretaire de ses finances donnees a Angiers le XIIII^e jour de juing l’an mil cinq cens et dix huit deuement veriffiees et expediees par messires les generaulx desdites finances le XVII^e jour dudit moys, pour le recompenser de plusieurs fraiz et despenses quil a faictes ou service dudit sire et fait encores chacun jour, et ce, oultre tous autres dons, gaiges, pensions et bienffaitz quil a euz par cy davant dudit sire, ainsi que lesdites lettres patentes et expedition dicelles cy rendues plusaplain le contiennent. […]

 [fol°393 verso]

A Francois le Forestier dit Picardie, Jehan le Forestier dit Daulphiné, heraulx d’armes du Roy, Pierre de Chocques de Bretaigne, Roy d’armes, Thibault Lucas dit Vannes aussi herault, Augustin de Lescarperie, Guillaume Cuschet trompecte dudit sieur Baptiste de Lescarperie, et Anthoine de Lescarperie trompecte de la Royne, la somme de cent escuz dor au souleil dont le Roy, notredit sire, leur a fait don pour les largesses royalles ou mois d’avril mil ceinq cens et dix huit. Pour cecy, par vertu cy rendue ladite somme de Cent ecuz souleil vallant II cent livres tournois.

 [fol° 387 verso]

A maistre André Dal Serte paintre florentin, la somme de deux cens escuz d’or au souleil, a luy ordonnee par le Roy notredit sire et sondit roole pour aucunement le recompenser des fraiz et despense qu’il a faiz a venir de sa maison vers ledit sire et pour luy ayder a vivre et soy entretenir en son service en actendant quil ait estat dudit sire. Pour cecy, par ledit roole et quictance dudit Dal Sarte, cy rendue ladite somme de II cent escuz souleil vallant IIII cent livres tournois.

 [Fol 402 Verso ] (transcription faite par Léa Dupuis)

A maitre Phellippes Testu la somme de vingt cinq livres tournois et luy ordonnee par mondit sire le general et sondit roolle pour faire refaire les vittres de l’eglise Sainct Florentin d’Amboise, qui furent levees et rompues au battisement de monseigneur le Dauphin ; pour cecy, payé par ledit Sappin par vertu dudit roolle et de sa quictance le 14ème jour d’octobre mil cinq cens dix huit cy rendue ladite somme de XXV livres tournois.

[fol°460 verso]

A Bernard Fortier, marchant demourant en la ville de Tours, la somme de trois mil soixante quinze escuz d’or ou souleil, a luy ordonnee par le Roy notredit sire et ses lettres patentes signees de sa main et de maistre Florimont Robertet, secretaire de ses finances, donnees a Paris, le XXVIII^me jour de novembre l’an mil cinq cens et dix huit veriffiees et expediees par messires les generaulx de sesdites finances pour la quantité de VI^xx III milliers de souffre nect prix de marc quil a venduz et livrez a iceluy sieur. Et iceulx mises en mains de maitre Florimont Fortier, conseiller du Roy, tresorier et garde de son artillerie, pour mectre ou tresor dicelle et en faire ce que ledit sire ordonna et commanda lors, et ce, par pris et marché fait avec ledit Fortier par messires Jaques Galiot, chevalier seneschal d’Armignac et maistre de son artillerie et de Jaques de Beaune, aussi chevalier, gouverneur et bailly de Touraine, a raison de II ecuz et demy d’or le cent, ainsi quil est plusaplain le contenir et declairé esdites lettres. Par vertu desquelles, et de la certisficacion dudit Fortier signee de sa main comme il confesse avoir receu dudit Bernard Fortier, ledit nombre et quantité de VI^xx III mil souffre nectz prix de mare, cedit present receveur general a paié comptant audit Fortier, ladite somme de III mil LXXV ecuz souleil comme par sa quictance signee a sa requeste de maistre Michel, chevalier notaire et secretaire dudit sire, le XXIIII^me jour d’avril l’an mil cinq cens et vingt apres pasques, cy rendue appert pource cy ladite somme de III mil LXXV ecuz souleil vallant VI mil cent L livres tournois.

 [fol° 498 verso]

A madame Magdeleine de Boulongne, duchesse d’Urbin, la somme de deux mil escuz d’or au souleil a elle donnee et ordonnee par le Roy, pour icelle convertir et emploier en veisselle d’argent, dont ledit sire luy a fait don oultre et par-dessus les autres sommes de deniers, qui luy ont esté ou seront cy apres ordonnees par ledit sire. Pour cecy, par vertu dudit roole du Roy et quictance cy rendue, ladite somme de II mil escuz souleil vallant IIII M livres tournois.

KK//289/2

[Fol° 507]

A maistre Jehan Sapin, conseiller du Roy notredit sire, receveur general de ses finances et par luy, commis a tenir le compte et faire les payemens de ses plaisirs et menuz affaires de sa chambre, la somme de quinze cens vingt cinq livres douze solz tournois a luy ordonnee par le Roy notredit sire et sondit roole, pour son remboursement de semblable somme par luy paiee en la presente et par l’ordonnance et commandement de Anthoine de Conflans, premier huissier de salle du Roy notredit sire, commissaire et cappitaine general de ses bateaulx et par luy verballement commis. Et a ordonnés des payemens et souldes neccessaires estre faiz pour le voyage que icellui sire a fait par eaue avec son train et suycte puis la ville d’Amboise jusques a celle d’Angiers, et ce tant, pour l’achapt de toilles, tainctes, cordes, cloux, fil, verges de fer et serreures que pour le sallaire et journees des maistres bastelliers, compaignons mariniers et autres nommez speciffiez et declairez en ung roole de papier signé et certiffié par ledit de Conflans, contenant quictance generale des payemens faiz particulierement aux desnommez en icellui. Laquelle somme de XV cent XXV livres XII solz tournois ledit sire veult et entend estre passee et allouee audit receveur general en rapportant ledit cahier seullement, sans ce quil soit tenu faire apparroir de la commission et povoir dudit Conflans, pour ordonner desdits payemens. Lesquelz en tant que mestier est ou seroit, ledit sire a vallidez et auctorisez, vallide et auctorise, par ledit roole et veult servir d’acquict a cedit present receveur general et estre dautel effect et valleur comme si lesdites parties avoient esté ou estoient par luy ordonnées et commandées. Et si ledit roole estoit certiffié et signé d’icellui sieur ne rapporter autre ordonnance, certifficacion, quictance desdites parties ou autre acquict, fors ce que dit est et ledit roole par vertu duquel et dudit cahier dessus declairé, ledit present receveur general a prins et retenu par ses mains ladite somme de XV cent XXV livres tournois.

[Fol°508 à 509 recto](transcription  faite par Lucie Gaugain)

A cedit present receveur general la somme de six mil cent quarante trois livres quinze solz huit deniers tournois a luy ordonnee par ledit sire pour son remboursement de semblable somme quil a paiée, baillee et delivree par ammandement verbal du Roy tant pour le fait du baptisement de monseigneur le daulphin fait a Amboise en l’église Sainct Florentin le XXVème jour d’avril Vc XVIII, pour le preparatif du festin fait pour les nopces du duc d’Urbin, nepveu du pape avec ma dame Magdeleine de Boulongne sa femme, qui furent le IIème jour de may ensuyvant que pour les fraiz faiz pour le bastillon fait au viel marché d’Amboise oudit mois de may et recompense de explanades et gastz faiz en plusieurs jardins et autres terres, pour faire voye et chemyn a passer l’armee tant de gens de cheval que de pied venans du camp de l’artillerie pour combatre au bastillon ainsi quil est plus a plain contenu et declairé en ung cahier de parchemin signé et deuement certiffié par messire Jaques de Beaune, chevalier sieur de Samblancay et contrerolle, par maitre Philbert Babou contrerolleur de l’argenterie dudit sire en rapportant lequel cahier que ledit sire a vallidé et auctorisé, vallide et auctorise par ce present roole et veult estre dautel effect et valleur pour servir audit Sapin comme s’il estoit signé et certiffié par luy et les quictances particulieres des personnes nommees en icelui jusques a la somme de C solz tournois et audessus, le Roy notredit sire veult ladite somme de VI mil Cent XLIII livres XIIII solz VIII deniers estre passee et allouee audit receveur general en la despense de ses comptes, sans ce quil soit tenu faire apparroir du povoir ou commission desdits sieur de Samblancay et contrerolleur Babou ne rapporter autre certisficacion, acquict ne quictance, fors ce que dit est dont entant que mestier servit le Roy notredit sire la relevé et relvue de grace especial par ledit roole par vertu duquel, dudit cahier dessus declaré, cedit present receveur general a prins et retenu par ses mains ladite somme de VI mil Cent XLIII livres XIIII sols VIII deniers.

[Fol°509 verso]

A Francisce Gale millannois, la somme de trois cens cinquante escuz d’or au souleil a luy ordonnée par le Roy notre sire pour lachapt et payement d’un grant tableau de toille ouquel est la senne en painture que le Roy, notredit sire, a fait prandre et achapter de luy et icellui fait mectre en la salle de son armurerie de son chastel d’Amboise pour cecy, par vertu dudit roole et quictance dudit Gale, cy rendue ladite somme de III cent L ecuz le souleil vallant VII cent livres tournois.

[Fol°510 recto/verso]

A maistre Jehan aux cousteaulx, medecin du Roy la somme de deux cens livres tournois a luy ordonnee par ledit sire pour sa pension durant l’annee finye mil Vc XVIII obmise a coucher en l’estat general d’icelle annee ; pour cecy, par vertu d’iceluy roole et de la quictance dudit aux cousteaulx cy rendu, est cy emploié en despense ladite somme de II cent livres tournois.

A Jehan Lombart, paintre deviseur demourant a Millan, la somme de deux cens escuz d’or au souleil que ledit sire luy a donnee et ordonnee ou mois de may Vc XVIII, pour son voyage davoir conduict puis ledit lieu de Millan jusques a Amboise le pavillon de velour cramoisy d’icelui sire, semé par dessus de broderie ; et pour autres causes, avy mouvans ledit sire dont il ne veult cy autre declaracion estre faicte pour cecy par vertu dudit roole, de la quictance dudit Lombart, est cy emploié en despense ladite somme de II cent ecuz souleil vallant IIII cent livres tournois.

[Fol°512 recto] (transcription faite par Lucie Gaugain).

A Dominique de Cortonne la somme de soixant livres tournois a luy ordonnee par le Roy notre sire, pour ses peines et sallaires d’avoir vacqué en dilligence de jour et de nuyt c’est assavoir X journees a faire faire ledit bastillon fait ou grant marché d’Amboise pres le tournoy du baptisement de monseigneur le daulphin, oultre six nuyctees quil a aussi vacquees et XVI journées, oultre quatre nuyctees, a faire faire les eschauffaulx es galleries quil a convenu faire pour le baptisement de monseigneur le daulphin ; aussi a faire la salle pour les nopces de monseigneur le duc d’Urbin pour cecy, par vertu dudit roole et quictance dudit de Cortonne cy rendue ladite somme de LX livres tournois.

[ Fol°512 verso]

A Bricet Dupré, tappicier du Roy notre sire, la somme de quatre vingts quatre livres tournois a luy ordonnee par ledit sire pour son remboursement de semblable somme quil a paiee a quatre charretiers pour mener et conduire les vielles toilles de chasse dudit sire, quil a ordonné estre menees d’Amboise en la ville de Coignac pour sen servir. Auquel voyage, il a vacqué par XII jours tant a aller dudit Amboise audit Coignac que retourner en ladite ville d’Amboise qui est au feur de XXXV solz pour chacun d’eulx par jour ; pour cecy, par vertu dudit roole et de la quictance dudit Dupré, cy rendue ladite somme de IIIIxx IV livres tournois.

[ Fol°531 recto]

A Jehan Brodeau l’aisné, marchant pelletier demourant a Tours, la somme de seize cens livres tournois a luy ordonnée par le Roy notredit sire pour une panne et fourreure de peaulx de martres subelines (zibelines) par lui vendue et livree audit sire et mise en ses mains durant ceste presente annee, pour soy servir et faire son plaisir ; pour cecy, par vertu dudit roole et quictance, cy rendue ladite somme de XVIc livres tournois.

[fol°531]

A messire Jehan de Valence, marchant espaignol, la somme de mil escuz dor au souleil a luy ordonnée par le Roy notre sire et sondit roole pour l’achapt et paiement d’un gros dyament que ledit sire a fait prandre et achapter de luy par monsieur de Bonnyvet pour fiancer, ou nom de monseigneur le daulphin, madame la princesse d’Angleterre. Lequel dyament, mondit sire de Bonnyvet a baillé a ladite princesse. Laquelle somme, ledit sire veult estre passée et allouée audit receveur general par vertu dudit roole en rapportant quictance dudit marchant seullement et faire ce quil soit tenu faire apparroir de la certisficacion, de la delivrance dudit dyament ne rapporter autre acquis, certisficacion ou quictance fors ce que dit est, seullement pour cecy, par vertu dudit roole et quictance dudit de Valence, cy rendue ladite somme de M ecuz souleil vallant II Mil livres tournois.

[Fol°531 verso]

A Jaques Housseau la somme de cent cinquante livres tournois a luy ordonnee par le Roy pour convertir et emploier en la despense des jumens que ledit sire a fait venir de Flandres et ce, oultre et par dessus toutes autres sommes de deniers quil a receues dudit receveur general pour semblable cause, pour cecy, par recepissé dudit Housseau en papier signé de sa main le XXVIIème jour d’avril l’an mil Vc XVIII, en vertu duquel le Roy veult et entend que ladite somme de C L livres tournois soit allouée es comptes et rabatue de la recepte de cedit present receveur general. Tout ainsi que si ledit recepissé ou certisficacion avoit esté receu et passé par l’un de ses notaires et secretaires et quil feust en forme auctenticque selon et en ensuyvant l’ordre et stille de sa chambre des comptes, sans ce que cedit present receveur general soit tenu rapporter autre acquict, certisficacion ne quictance fors ce que dit est, dont entant que mestier est ou seroit ledit sire la relevé et relieve par ledit roole par lequel il a vallidé et auctorisé, vallide et auctorise ledit recepissé ; pour cecy, en vertu d’icelui roole et de sa quictance cy rendue ladite somme de C L livres tournois.

[Fol°532 recto]

A Bricet Dupré, tappissier et varlet de chambre ordinaire du Roy, la somme de trois cens vingt trois escuz d’or au souleil et ung solz dix deniers obole tournois monnoie a luy ordonnee par ledit sire, assavoir est la somme de III cent XV ecuz au souleil VI solz X deniers oboles tournois pour cent neuf aulnes, ung tiers et demy quart de tappisserie a haulte lisse aulne de Paris, en laquelle est portraict et tissué l’istoire de Hercules du feur de II ecuz et XXXV [solz] l’aulne. Laquelle il a vendue audit sire pour servir ordinairement a monseigneur le daulphin de Viennois, la somme de V ecuz souleil et XXX solz tournois pour la garnuture d’icelle et la somme de II ecuz souleil pour avoir envoyé querir icelle tappycerie a ses despens en la ville de Paris ; pour cecy ladite somme de III cent XXIII ecuz souleil et I sol X deniers oboles vallant la somme de VI cent XLVI livres I sol X deniers obole qui, paiee a esté audit Dupré par cedit present receveur general en vertu dudit roole comme par sa quictance, cy rendue appert pour cecy, ladite somme de VI cent XLVI livres I sol X deniers oboles tournois.

[Fol°532 verso, Fol°533 recto]

A cedit present receveur general la somme de quatorze cens quatre vingts neuf livres quatorze solz tournois a luy ordonnee par le Roy pour son remboursement de pareille somme quil a paiee et desboursee de ses deniers par ordonnance et commandement de Verdun Taboys, maitre de la fourreure d’icelui sire et par luy, verballement commis pour ordonner des payemens neccessaires estre faiz pour les lisses et tournoys que ledit sire a commandé faire en sa ville d’Amboise ou mois de may M Vc XVIII pour la nativité de monseigneur le daulphin a plusieurs personnes, escriptes et nommees en ung cahier de papier signé et certisfié dudit Taboys, tant pour achapt de pelles, picqs, civieres, seilles, journee et sallaires de manouvriers, pyonniers, charpentiers et charretiers que autres choses a plain contenues et declairees oudit cahier de papier ; en vertu duquel, le Roy veult et entend que ladite somme de XIIII cent IIIIxx IX livres XIIII solz tournois soit allouee es comptes et rabatue de la recepte de cedit present receveur general, en rapportant ledit cahier en la fin duquel est la certisficacion et quictance generale des personnes y denommees, signee et certisfiee comme dit est, et ledit roole signé de la main du Roy notredit sire, tant seullement par lequel ledit sire a vallidé et auctorisé, vallide et auctorise ledit cahier de papier tant ainsi que sil estoit signé et certisfié par luy et si lesdites parties auroient esté par luy ordonnees et commandees et que si la certisficacion et quictance generale avoit esté passée et receue par l’un de ses notaires et secretaires sans ce que cedit receveur general soit tenu faire apparroir de la commission et povoir dudit Tabois parce quil fut a ce, verballement commis par ledit sire ne rapporter les quictances particulieres des persones nommees oudit cahier, ne semblablement autre acquict, certisficacion, ne quictance que ce que dit est dont entant que mestier seroit ledit sire en a relevé et releve icelui present receveur general par ledit roole. Par vertu desquelz cahier et roole, cedit present receveur general a prins et retenu par ses mains ladite somme de XIIII cent IIIIxx IX livres XIIII solz tournois.

[Fol°533 recto]

A Jehan Anthoine Mananym garde et gouverneur des lyons du Roy estans en son chastel d’Amboise, la somme de deux cens soixante dix livres tournois a luy ordonnee par ledit sire pour la nourritre et despense desdits lyons durant ceste presente annee, commancee le premier jour de janvier mil cinq cens et dix sept et finissant au derrenier jour de decembre apres ensuyvant M Vc dix huit qui est a raison de XXII livres X solz par chacun mois. Pour cecy par vertu dudit roole du Roy cedit present receveur general a paié comptant audit Manamyn ladite somme de II cent LXX livres, comme par sa quictance cy rendue appert pour ce icelle somme de II cent LXX livres tournois.

[Fol°532 verso]

A Jehan Gale, brodeur de la Royne, la somme de soixante trois livres dix solz tournois pour plusieurs parties de son mestier quil a faicte fournyes et livrees pour l’obsecque et funerailles de feue madame Loyse de France, ainsi quil appert par lez parties de ce faisant mencion contenue en une fueille de papier signees et certisfiees par Guillaume de Beaune, receveur des tailles en Poictou et contrerolleur general des finances, argenterie et despense de monseigneur le daulphin ; en vertu desquelles parties, le Roy notredit sire a vallidees et auctorisees, vallide et auctorise par ledit roole et de la quictance dudit Gale cy dessus, ledit sire veult et entend ladite somme soit passee et allouee es comptes et rabatue de la recepte de cedit present receveur general, sans ce quil soit tenu faire apparroir de la commission ou povoir dudit de Beaune, ne rapporter autre certisficacion, acquict ne quictance fors ce que dit est dont entant que mestier seroit icelui sire la relevé et releve de grace espacial par ledit roole ; pour cecy, par vertu desdites parties, roole et quictance dicelui Gale ; est cy couché en despense ladite somme de LXIII livres X solz tournois.

[Fol°536 verso]

A Salay, serviteur de maistre Leonnard de Vince paintre du Roy, la somme de cent escuz d’or Souleil dont le Roy notredit sire luy a fait don en faveur des services qui luy a faiz soubz sondit maitre et ce, oultre et par dessus les autres dons et bienffaiz quil a euz et pourra avoir dudit sire cy apres ; pour cecy, par vertu d’icelui roole et de la quictance dudit Salay, cy rendue ladite somme de II cent livres tournois.

[fol°537 recto/verso]

Audit maitre Jehan Sapin, present receveur general, la somme de cinquante quatre escuz dor au souleil a luy ordonnée par le Roy pour son remboursement de semblable somme quil a paiee de ses deniers par commandement d’icelui sire, a Jehan de Bardy, marchant florentin demourant a Tours, pour la despense de bouche que maistre André le paintre et son homme ont faicte en sa maison par l’espace de neuf mois entiers et ce, par commandement dudit sire ; pour cecy, prins et retenu par icelui receveur general ladite somme de LIIII ecuz souleil vallant C VIII livres tournois.

[Fol° 537 verso, Fol°538 recto]

A Jaques Bienvenu, maistre queux de cuysine de bouche du Roy notredit sire, la somme de quinze livres douze solz tournois a luy ordonnee par ledit sire pour aucunes parties quil a fournyes de son mestier ou banquet et festin que fist icelui sire en l’année M Vc et dix huit au cloux d’Amboise, ainsi quil est apparu par les parties de ce faisant mencion, qui ont esté veues au bureau dudit sire icelles rompues et cancellees ; pour cecy, par quictance en vertu de laquelle le Roy veult et entend que ladite somme soit passee et allouee es comptes et rabatue de la recepte de cedit present receveur general sans ce quil soit tenu apporter lesdites parties, ne autre acquict, certisficacion ne quictance fors ce que dit est, dont entant que mestier seroit ledit sire, la relevé et relieve de grace espacial par ledit roole par vertu duquel, est cy emploié en despense icelle somme de XV livres XII solz tournois.