Mailles, Jacques de, La tres joyeuse plaisante & recreative hystoire composee par le loyal serviteur des faicts gestes triumphes et prouesses du bon chevalier sans paour et sans reproche le gentil seigneur de Bayart dont humaines louenges sont espandues par toute la chrestiente, Paris, Galliot Du Pré, 1527, 98 f.

vf. lxxxix

De la bataille que le roy de France François premier de ce nom eut contre les suysses a la conqueste de sa duche de Milan ou il demoura victorieux, et comment apres la bataille, gaignee voulut est fait chevalier de la main du bon chevalier sans paour et sans reprouche. chapitre lx^e

Le roy de France qui fut bien joyeux de la prinse du seigneur Prospre aussi avoit il raison marcha avecques son armee le plus legierement quil peut, et vint par dedans le pymont a Thurin ou le duc de Savoye son oncle le receut honnestement. Les Suysses qui sestoient mis sur les passages quant ilz sceurent la prinse du seigneur Prospre et la rotte de sa bende les habandonnerent et se retirerent vers Milan ou ilz furent tousjours poursuyviz. Quelque propos dappoinctement se mist sus, et le tenoit lon quasi conclud, parquoy le duc de Gueldres alye et tousjours loyal serviteur de la maison de France lequel avoit amene une troppe de dix mille lansquenetz au service du roy sen retourna en ses pays, mais il laissa ses gens a son nepveu le seigneur de Guyse frere de ce gentil prince le duc de Lorraine et a ung sien lieutenant quon appelloit le cappitaine Miquel. Ce propos continua tousjours que lappointement se feroit, tant que larmee du roy approcha a douze ou quinze mille de Milan ou sestoient retirez les suysses aveceques se bon prophete le car-

vf. lxxxix v°

-dinal de Syon qui toute sa vie a este ennemy mortel des françois comme encores bien le monstra a ceste fois. Car neantmoins que le seigneur de Lautrec feust alle porter les deniers a Galezas pour satisfaire au pourparle appoinctement ung jeudy au soir prescha si bien ses suysses et leur remonstra tant de choses, que comme gens desesperez sortirent de Milan et vindrent ruer sur le camp du roy de France. Le connestable duc de Bourbon qui menoit lavantgarde se mist en ordre incontinent, et advertit le roy qui se vouloit mettre au soupper, mais il le laissa la et sen vint droit vers ses ennemys qui estoient desjà meslez a lescarmouche qui dura longuement devant quilz feussent au grant jeu. Le roy de France avoit gros nombre de lansquenets, et voulurent faire une hardiesse de passer ung fosse pour aller trouver les suysses qui en laisserent passer sept ou huyt rencs, puis les vous pousserent, de sorte que tout ce qui estoit passe fut gecte dedans le fosse et furent fort effrayez lesditz lansquenetz. Et neust este le seigneur de Guyse qui resista a merveilles, et en fin fut laisse pour mort. Le duc de Bourbon connestable, le gentil conte de sainct Pol, le bon chevalier et plusieurs autres qui donnerent au travers de ces bende de suysses ilz eussent fait grosse fascherie, car il estoit jà nuyt et la nuyt na point de honte. Par la gendarmerie de lanvantgarde fut le soir rompue ceste bende de suysses ou une partie denviron deux mille vint passer viz a viz du roy qui gaillardement les chargea, et y eut lourt combat, de sorte quil fut en gros dangier de sa personne, car sa grant buffe y fut percee a jour dung coup de picque. Il estoit desja si tard que lon ne voyoit pas lung lautre, et furent contrainctz pour ce soir les suysses se retirer dung coste et les francois dung autre et se logerent comme ilz peurent, mais je croy bien que chascun ne reposa pas a son ayse, et y prist aussi bien en gre la fortune le roy de France que le moindre de ses souldars, car, il demoura toute la nuyt a cheval comme les autres. Il fault scavoir une chose du bon chevalier sans paour et sans reprouche qui fut bien estranger et tresdangereuse pour luy. À la derniere charge quon fist sur les suysses le soir il estoit monte sur ung gaillart coursier qui estoit le second, car la premiere charge luy en fut tue ung entre ses jambes. Ainsi quil voulu donner dedant fut tout enferre de picques, de façon que sondit cheval fut desbride. Quand il se sentit sans frain se mist a la course, et en despit de tous les suysses ne de leur ordre passa tout oultre, et emportoit le bon chevalier droit en une autre troppe de suysses neust este quil rencontra en ung champ de seps de vigne qui tiennent darbre en arbre ou il par force sarresta. Le bon chevalier fut bien effraye et sans cause, car il estoit mort sans nul remede sil feust tumbe entre les mains des ennemys. Il ne perdit toutefoyes point le sens, mais tout doulcement se descendit, et gecta son armet et ses cuyssotz, et puis le long des fossez a quatre beaulx piedz se retira a son oppinion vers le camp des francois

vf. xc

et ou il oyoit crier France. Dieu luy fist la grace quil y parvint sans dangier, et encores qui mieulx fut pour luy, cest que le premier homme quil trouva fut le gentil duc de Lorraine lung de ses maistres qui fut bien esbahy de le veoir ainsi a pied. Si luy fist ledit duc incontinent bailler ung gaillart cheval quon nommoit le Carman dont luy mesmes autreffois luy avoit fait present, et fut gaigne a la prinse de Bresse, et a la journee de Ravenne fut laisse pour mort, et en descendit le bon chevalier par ce que il avoit deux coups de picque aux flancs, et en la teste plus de vingtz coupz despee. Mais le lendemain quelcun le trouva quil paissoit, et commenca a hannir parquoy fut ramenee au logis du bon chevalier qui le fist guarir, mais sestoit une chose non croyable que de son faict, car comme une personne se laissoit coucher et mettre tentes en ses playes sans remuer aucunement. Et depuis quant il voyoit une espee couroit lempoigner a belles dens, ne jamais ne fut veu ung plus hardy cheval, et y feust Bucifal celluy de Alexandre. Quoy que ce soit le bon chevalier fut bien joyeulx de se veoir eschappe de si gros dangier et remonte sur ung si bon cheval, mais il luy faschoit quil navoit point darmet, car en telz affaires sait moult dangereux avoir la teste nue. Il advisa ung gentil homme fort son amy qui faisoit porter le sien a son paige, auquel il dits Jay paour de me morfondre pource que jay sue davoir si longement este a pied, je vous prie faictes moy bailler vostre armet que vostre homme porte pour une heure ou deux. Le gentil homme qui ne pensoit pas ce ce que le bon chevalier entendoit le luy fist bailler dont il fut bien ayse, car depuis ne le lassa que la bataille ne feust finye qui fut le vendredy environ dix ou unze heures, car des le point du jour les suysses voulurent recommencer, et vindrent droit a l’artillerie des françois dont ilz furent bien serviz. Touttefois jamais gens ne combatirent mieulx, et dura laffaire trois ou quatre bonne heures. En fin furent rompus et deffaictz, et en mourut sur le camp dix ou douze mille. Le demourant en assez bon ordre le long d’ung grant chemin se retirerent a Milan ou ilz furent conduytz a coups despee, tant par les françois que par le cappitaine general de la seigneurie de Venise messire Barthelome daluyano qui peu devant estoit arrive avecques le secours des veniciens, et y perdit en une charge quil fist deux ou trois cappitaines, entre lesquelz fut le filz du conte Petilano. Les francois y firent grosse perte, car du jeudy ou du vendredy moururent Francois monsieur de Bourbon, le gentil cappitaine ymbercourt, le conte de Sanxerre et le seigneur de Mouy, et y furent blessez le prince de Talmont et le seigneur de Bucy dont depuis moururent. Le roy se mist en conseil pour veoir si lon poursuyvoit les Suysses ou non. Plusieurs furent de diverses oppinions. En fin il fut advise pour le mieulx que on les laisseroit aller,

vf. xc v°

car on en pourroit bien avoir a faire le temps advenir. Le jour quilz deslogerent du camp demourerent a Milan, et le lendemain en partirent tirans en leurs pays. Ilz furent poursuyviz de quelques gens, mais non pas a lextremite : car si le roy eust voulu ne sen feust pas sauve ung. Le soir du vendredy dont fina la bataille a lhonneur du roy de France fut joye demenee parmy le camp, et en parla lon en plusieurs manieres et sen trouva de mieulx faisans les ungs que les autres : mais sur tous fut trouve que le bon chevalier : par toutes les deux journees sestoit monstre tel quil avoit acoustume es autres lieux ou il avoit este en pareil cas. Le roy le voulut grandement honnorer, car il print lordre de chevalerie de sa main. Il avoit bien raison, car de meilleur ne leut sceu prendre. Le seigneur Maximilan sforce qui occupoit la duche comme son pere le seigneur Ludovic avoit fait autreffois demoura ou chasteau de Milan ou on mist le siege : mais gueres ne demoura quil ne se rendist, et luy fut faicte composition dont il se contenta : et sen allerent ceulx qui estoient dedans leurs bagues sausves. Je laisseray a parler de tout ce qui advint en deux moys : mais ou moys de decembre alla le roy de France visiter le pape en la cite de Boulongne qui luy fist gros recueil. Ilz eurent devis ensemble de plusieurs choses dont je nempescheray aucunement ceste histoire.